Anno dom. im XV. hundert der geburth Cristi, vnsers liben herrn, am sontag nach Thimothei sinth vor vns irschin vnsere libeil getrewen Wenczel Monczer vnd Eyttelhans als oberleuthe, neben andern auch die parth, die eß belanget personlichen, nemlich Mathes Prawße mit seyner fruntschaft an eynem, vnd Wenczel Swarczel mit seyner fruntschaft des andern teyls, vnd haben vns irczalt, wie sy fruntlich vnd sonlich gehandelt hetten vmb des todschlages Georgen Prawßen gotzeligen, der in vnsern gerichte Grawppen ermorth vnd derschlagen ist, vnd heften sich nicht mogen in eczlichen artikulen voreynigen vnd dieselbigen clar vortragen vnd angegeben. Dorvff wir Thimo von Coldicz, herr auffn Grawppen etc., als irer beyder erbherre die parthen gefroget, ab sy den handel bey vns mecbtiklichen vnwidderrufflich bleyben wollen, des sy vns mit handt vnd munde vnd bey eyner pena funfczigk schock czu halden gelobet haben, sprechen vnd scheiden wir sy in kraft diß vnsers gegeben recesses: Am ersten das Wenczel Schwarczel anstat des thetters richtung halden vnd thun sal. Czum andern sal er dreyssick zelemessen vnd vigilien in vnser pfarrekirchen bestellen der armen zele czu troste. Czum dritten sal er ein selebade lossen halden mit aller czurichtung noch gewonheith. Sal alles gescheen czwischen hir vnd weinachten. Czum vierden mal er geben seynem weybe vnd kyndern sechczehn swerthschock auff tagczeith, nemlich IIII schock vff Martini nestkomende, IIII schock vff vasnacht dornoch folgende, IIII schock vff Johannis Baptiste dornoch komende, vnd IIII schock vff Galli, alles nochenander folgende. Czum funften sal er die gerichte, geistlich vnd werntlich, gewynnen. Czum sechsten sal er mit vns adder mit vnsern amachtman¹) vmb das aufhebegelt vortragen. Czum sibenden vmb das vorsprechergelt dergleichen. Czum achten sal er geben vor die czerunge, die dorvnder vorczerth ist, II schock; sal auch alles czwischen hier vnd weynachten gescheen vnd gefallen. Czum newnden sal er ein steynen krewcz bestellen vnd seczen lossen, auch dy stat von der herschaft in joer vnd tag gewynnen. Czum czehenden sal er ein Romfarth alhie im lande mit seynes selbes leybe vorbrengen vnd mit warer vrkunde sulchs weyslich machen. Czum eylften sal er ein ewigk gedechtnisse in das todenbuch in vnser pfarrekyrchen bestellen, vff das man alle quartale neben andern gelawigen zelen vor jn bitte. Czum czwelfften ein gewonlich bette mit slechten worthen kegen seynen bruder vnd frunden czu thun vmb gottes wille vnd vmb vnser lieben frawen ere willen, wie die that gescheen sey, czu vorgeben. – Mit dießen artikulen sollen die parthen gancz gescheiden vnd gericht sein, vnd alle, dy dorvnder vordocht sein, kein teyl dem andern das nymmer meer in roch noch in argk hernoch anders würde auffheben noch bereden. Welliche parth das thette vnd sulchs mit warer vrkunde vberkomen wurde, sal vns dy obgemelte pena funfczigk schock vorfallen sein. Vnd Wenczel Swarczel sal vnd mag sich seiner scheden an denjenigen irholen, der sich czu der that bekanth hol in seynem brieffe, den er hol jm das in der richtung vorbehalden.. Des haben wir Thimo von Goldicz, herr auff Grawppen etc. iczlichen parth eynen recesse gegeben mit vnsern insigeln czurucke besigelt, dato anno et die ut supra. Des haben beyde parth gebeten, sullichen receß in das statbuch czu schreyben, das gescheen ist montag am tage sanct Pauli bekerungk in 1501. jore. Dobey gewest Wenczel Moczer, burgermeister, Melchior Sommer, Hans Pfeffer, Hans Swedler, Hans Fischer, Nickel Swarczel, Nickel Frewdel, Jocoff Moller, Valten Siber, Mathes jancko, Hanus Harttel, Valten Goltsmidt, richter.

   Gr. St. B. A, S. 330, 331, 332. - ¹) Amtmann. – Das letzte eigentliche, im Stadtbuche vorfindliche Sühnegerichtsprotokoll nach deutschem Rechte. Der Loskauf von der Blutschuld durch ein Sühnegeld blieb noch im späteren Strafverfahren der Maximilianischen Halsgerichtsordnung aufrecht. Vgl. Liber manualis, Fol. 52 b, 53 b, 67 b, Testamentenbuch, Fol. 34 b, Teplitzer Stadtbuch IV, 93 etc. Vgl. Alt-Turn, S. 70.